Plantun de Prouvènço

Pèr coumpara dos planto d'encò nostre

Schoenoplectus tabernaemontani & Scleranthus annuus

Serreto

Schoenoplectus tabernaemontani

Cyperaceae

Àutri noum : Jounc-de-la-palun, Sarreto.

Noms en français : Jonc-des-chaisiers, Jonc-des-tonneliers.

Descripcioun :
La serreto, o jounc-de-la-palun, fai de lòngui cambo souvènti-fes verdalo (subsp.glaucus-fotò-) bèn couneigudo pèr li sagnaire. La bratèio despasso raramen l'inflourejado facho de noumbróusis espigueto (3 à 11 mm). Lis escaumo soun bruno, retaiado e cihado. I'a, en generau, dous estigmate.

Usanço :
Li cambo de serreto soun plegadisso emai proun resistènto. Un cop secado servien pèr sagna li cadiero emai pèr la banastarié e la capelarié. Lis indian d'Americo n'en fasien meme de batèu.

Port : Grando erbo
Taio : 0,5 à 3 m
Fueio : costo paralèlo
Tipe bioulougico : Eloufite
Cicle bioulougico : Planto renadivo

Gènre : Schoenoplectus
Famiho : Cyperaceae

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Palun - Ribiero - Mueio
Estànci : Termoumediterran à Mesoumediterran
Couroulougi : Pancaro entresigna
Ref. sc. : Schoenoplectus tabernaemontani (C.C.Gmel.) Palla, 1888 (= Schoenoplectus lacustris subsp. glaucus Bech = Scirpus lacustris L., 1753 )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.